ONN:Oduu Olmaa Oromiyaa Muddee 12/2017

ONN: Oduu Olmaa Oromiyaa Muddee 12/2017

አቃቢ ህግ አቶ በቀለ ለፌደራል ጠቅላይ ፍርድ ቤት ሰበር ሰሚ አጣሪ ችሎት ባቀረቡት መልስ ላይ ምላሽ ሰጠ፡፡
==========================================================
[OBN 02-04-2010] አቃቢ ህግ አቶ በቀለ ገርባ ለፌደራል ጠቅላይ ፍርድ ቤት ሰበር ሰሚ አጣሪ ችሎት ባቀረቡት መልስ ላይ ምላሽ ሰጠ። ከዚህ ቀደም አቶ በቀለ ገርባ በጠቅላይ ፍርድ ቤት ይግባኝ ሰሚ ችሎት በ30 ሺህ ብር ዋስትና እንዲወጡ መፈቀዱን ተከትሎ ጠቅላይ አቃቢ ህግ ይግባኝ በማለቱ ዋስትናው መታገዱ ይታወሳል። ይህን ተከትሎም እገዳውን በተመለከተ አቶ በቀለ ገርባ መልስ የሰጡ ሲሆን፥ በዚህ ላይም አቃቢ ህግ ዛሬ የመልስ መልስ ሰጥቷል። አቃቢ ህግ አቶ በቀለ በተደጋጋሚ የገለጹት መደበኛ ዳኛ ያልሆኑ የፍርድ ቤቱ ፕሬዚዳንት በተሰየሙበት የዋስትና መብቴን ተከልክያለሁ በማለት ያቀረቡትን መልስ በተመለከተ የፌደራል ፍርድ ቤቶችን ለማሻሻል በወጣው አዋጅ ቁጥር 454/1997 አንቀጽ 4 መሰረት፥ የፌደራል ከፍተኛ ፍርድ ቤት ፕሬዚዳንትና ምክትል ፕሬዚዳንት እንዲሁም የፌደራሉ የመጀመሪያ ደረጃ ፍርድ ቤት ፕሬዚዳንት በፍርድ ቤቶቻቸው በየትኛውም ችሎት እንደሚያስችሉ በህግ የተደነገገ መሆኑን ጠቅሷል። ፕሬዚዳንቱም ከዚህ አንጻር ችሎቱን ማስቻላቸውን በምላሹ ገልጿል። ተጠርጣሪዎቹ በተከሰሱበት መዝገብ ሆን ተብሎ ለዋስትና ጉዳይ እንደተሰየሙ በማስመሰል ያቀረቡትም የህግ መሰረት የሌለው በመሆኑ ተቀባይነት የለውም ብሏል። አቶ በቀለ የከፍተኛው ፍርድ ቤት ፕሬዚዳንት ውሳኔ ፖለቲካዊ መሆኑን ብንረዳም በማለት ያቀረቡትም በህገ መንግስቱ አንቀጽ 79 መሰረት ከማናቸውም ነጻ ሆኖ የሚዳኘውን ፍርድ ቤት በዚህ ሁኔታ መግለጻቸው ተገቢ ያልሆነና ህግን ያልተከተለ በመሆኑ ተቀባይነት የሌለው መሆኑንም ነው የገለጸው። ተጠሪ አቶ በቀለ ያቀረቡት መልስ የወንጀል ስነ ስርዓቱን ህግ ባለመከተል ከጉዳዩ ጋር ግንኙነት የሌለውን በመጥቀስ ከህግ በላይ በሆነ አካል አስተባባሪነት በማለት በሰጡት መልስ ላይ አቃቢ ህግ ከህግ በላይ የሆነ አካል የለም ሲልም በምላሹ አስረድቷል። ክርክራችን ዋስትና ሊፈቀድ አይገባም የሚል ነው ያለው አቃቢ ህግ ለዚህም ዋስትና ሊያስከለክሉ የሚችሉ ድንጋጌዎችን ጠቅሰን ያቀረብን በመሆኑ በዚህ አግባብ ሊታይልን የሚገባ ነው ብሏል። ያቀረብነው መልስም አቶ በቀለ ገርባ ህጉን ባለመከተል ግንኙነት የሌላቸውን በመግለጽ ያቀረቡትን መልስ ውድቅ በማድረግ፥ ይግባኝ ሰሚ ችሎቱ የሰጠውን ውሳኔ በመሻርና የፌደራሉ ከፍተኛ ፍርድ ቤት የሰጠውን ውሳኔ በማጽናት እንዲያሰናብተን እናመለክታል ሲል የመልስ መልስ ሰጥቷል። ፍርድ ቤቱም መልሱን መርምሮ ምላሽ ለመስጠት ለታህሳስ 17 ቀን 2010 ዓ.ም ተለዋጭ ቀጠሮ ሰጥቷል። ኤፍ.ቢ.ሲ
OBN አማርኛ