GMN : ኮሚቴው ያቀረበው የጥናት ውጤት በጋሞ ዞን ተወካዮች ውድቅ ተደረገ።

#GMN | ኮሚቴው ያቀረበው የጥናት ውጤት በጋሞ ዞን ተወካዮች ውድቅ ተደረገ።

ደቡብ ክልልን እንደገና ማደራጀት በሚቻልባቸው አማራጭ ሀሳቦች ዙሪያ በጠቅላይ ሚኒስትሩ የተጠራ ስብሰባ በዛሬው ዕለት ተካሂዷል።

በስብሰባው ላይ ራስን በራስ የማስተዳደር ጥያቄ ወዳቀረቡ የደቡብ ክልል ዞኖች ተንቀሳቅሶ ህዝቡን ያወያየው “የሠላም አምባሳደሮች” ልዑክ በቆይታዬ ከህዝቡ አገኘሁት ያለውን የጥናት ሪፖርት ለአዳራሹ አቅርቧል።

የጥናት ውጤቱ መቅረብን ተከትሎ የተለያዩ ሀሳቦች የተነሱ ሲሆን ከነዚህም መካከል የቀድሞው ጠቅላይ ሚኒስትር ሀ/ማርያም ደሣለኝ አስተያየት ይገኝበታል።
አቶ ሀይለማርያም በንግግራቸው የኮሚቴውን የጥናት ሪፖርት በመደገፍ ሀሳባቸውን ሰጥተዋል። በተለይም ጋሞ እና ወላይታ በአንድ ክልል እንዲዋቀሩ ሀሳብ መቅረቡ ትክክለኛ እና የህዝብ ፍላጎት ነው ያሉ ሲሆን ሁለቱ ህዝቦች የሚለያቸው አንዳች ነገር የሌለ በመሆኑ አብረው መደራጀታቸው ተገቢ ነው በሚል የጥናት ቡድኑን ውጤት አሞካሽተዋል።

የጋሞ ህዝብን በመወከል የተገኙ ተሳታፊዎች በበኩላቸው አቶ አባዱላ ገመዳ እና ዶ/ር አሸብር ወ/ጊዮርጊስ የመሩት የሠላም አምባሳደሮች ቡድን ያቀረበው ሪፖርት ቡድኑ ከወራት በፊት አርባ ምንጭ ተገኝቶ ህዝቡን ባወያየበት ወቅት ከህዝቡ የተሰጠውን ምላሽ የማያሳይ እና ተቀባይነት የሌለው መሆኑን ገልጸዋል። በተመሳሳይ የኮንታ ልዩ ወረዳ ተወካዮች ሪፖርቱ የህዝቡን ፍላጎት የማያሳይ በመሆኑ ተቃውሞ አሰምተዋል።

ይሄንንም ተከትሎ ከአዳራሹ የቀረቡ ሀሳቦችን በጥሞና ያዳመጡት ጠቅላይ ሚኒስትር ዶ/ር ዐቢይ የጋሞ ዞን እና ኮንታ ልዩ ወረዳ ያቀረቡት የልዩነት ሃሳብ ላይ ማጣራት የሚያደርግ የሚኒስትሮች እና ከፍተኛ የሥራ ሀላፊዎች ቡድን አቋቁመዋል። በዚህ ቡድን ውስጥ የመከላከያ ሚኒስትሩ ለማ መገርሳ፣ የሠላም ሚኒስትሯ ሙፈሪያት ካሚል፣ አቶ መለሰ አለሙ፣ አቶ ሞገስ ባልቻ እና ሌሎችም ይገኙበታል።

ይሄ ቡድን ወደሁለቱ አካባቢዎች ተንቀሳቅሶ በአጭር ጊዜ ውስጥ የህዝቡን ፍላጎት እንዲያጣራና ሪፖርት እንዲያቀርብ ተጠይቋል። ዶ/ር ዐቢይ በቀጣይ በዚሁ ጉዳይ ላይ ተመሳሳይ ውይይት እንደሚኖር ገልጸዋል።

የጋሞ ህዝብ ተወካዮች 80 አባላትን የያዘው ቡድን ከዚህን ቀደም አርባ ምንጭ በመጣበት ወቅት ራስን በራስ ከማስተዳደር እና ደቡብን መልሶ ከማደራጀት ጋር በተያያዘ የኛ ፍላጎት ብለው ያቀረቧቸው፦
1ኛ. ጋሞ ራሱን ችሎ በክልልነት ይደራጅ
2ኛ. የመጀመሪያው አማራጭ መንግስትን ከከበደው ከጋሞ ህዝብ ጋር ተመሳሳይ የሥነልቦና ህብረት ካላቸው ህዝቦች ጋር ብቻ አንድ ላይ መደራጀት (ጋሞ፣ ደቡብ ኦሞ፣ ኮንሶ፣ አማሮ፣ ደራሼ፣ ቡርጂ፣ አሌ)
3ኛ. ከላይ የተቀመጡ ሁለት አማራጮች የማይቻል ከሆኑ 3ኛ እና የመጨረሻው ምርጫ የቀድሞውን ጋሞ ጎፋ ጠቅላይ ግዛት መልሶ ማምጣት። የሚሉ ናቸው።