Site icon Kichuu

ኢህአዴግ አሁን የደረሰበትን የሀሳብ አንድነት በተግባር በመግለጽ ሕዝቡን ለመካስ በትጋት እንደሚሰራ ገለፀ

ኢህአዴግ አሁን የደረሰበትን የሀሳብ አንድነት በተግባር በመግለጽ ሕዝቡን ለመካስ በትጋት እንደሚሰራ ገለፀ

አዲስ አበባ፣ ታህሳስ 25፣ 2010 (ኤፍ. ቢ. ሲ.) የኢትዮጵያ ሕዝቦች አብዮታዊ ዴሞክራሲያዊ ግንባር ኢህአዴግ አሁን የደረሰበትን የሀሳብ አንድነት በተግባር በመግለጽ ሕዝቡን ለመካስ ተግቶ እንደሚሰራ የአራቱ ብሄራዊ ድርጅቶች ሊቃነ መናብርት አስታወቁ።

የኢህአዴግ ስራ አስፈጻሚ ኮሚቴ ለ17 ቀናት ያካሄደውን ግምገማና የደረሰበትን ውጤት አስመልክቶ የአራቱ ብሄራዊ ድርጅቶች ሊቃነ መናብርት ዛሬ በጠቅላይ ሚኒስትር ጽሀፈት ቤት ማበራሪያ ሰጥተዋል።

የስራ አስፈጻሚ ኮሚቴው በ17ቱ ቀናት ግምገማ ወቅት “ከሰማይ በታች ምንም ዓይነት ነገር እንዲቀር አልተደረገም” በሚል በተደረገው ግምገማ ከመቼውም ጊዜ በላይ የሀሳብ አንድነት በመፍጠር ባለ ስምንት ነጥብ የትኩረት አቅጣጫ በማውጣት ለተግባር መሰረት መጣሉን ነው ያስታወቀው።

ግምገማውን ገና ከጅምሩ “ታሪካዊ ለማድረግ ታስቦ” የተገባበት በመሆኑ ሁሉም ብሔራዊ ድርጅቶች በአሸናፊነት የወጡበት፣ ከቅርብ ጊዜ ወዲህ በአገር ደረጃ ለተፈጠረው ችግር የአካል ተጠያቂነትን ያረጋገጡበት ግምገማ ማድረጋቸውን ነው ሊቃነ መናብርቱ ይፋ ያደረጉት።

በአገሪቷ ለተፈጠረውና በግልጽ እየታየ ላለው ችግር ሥራ አስፈጻሚው ራሱን ተጠያቂ በማድረግ ለችግሩ የመፍትሄ እርምጃ መውሰድ የሚያስችለው ቁመና ላይ መገኘቱንም ነው ያረጋገጡት።

በአሁኑ ግምገማ የተፈጠረው አመለካከት ለተግባር አንድነት መነሻ እንደሚሆን ያረጋገጡት ሊቃነ መናብርቱ፤ ሥራ አስፈጻሚው በፍጥነት ሊፈቱ የሚችሉ ችግሮችን በመለየት ለመፍታት ስራ መጀመሩን ነው ያመለከቱት ።

በግንባሩ ውስጥ እርስ በእርስ መጠራጠርና አለመተማመን እየሰፈኑ የመጡበት ሁኔታ እንደነበረ ሊቀመናብርቱ አስታውሰው ችግሩን ለመፍታት የሚያስችል ጠለቅ ያለ ግምገማ መደረጉንና የሃሳብ አንድነት መፈጠሩን ገልፀዋል ።

የኢህአዴግና የደኢሕዴን ሊቀመንበር ኃይለማርያም ደሳለኝ እንደተናገሩት ሥራ አስፈጻሚው በነጻነትና ግልጽነት ወስኖ በገባው መሰረት የሀሳብ አንድነት ለመፍጠር ያስቻለውን ጥልቅ ውይይት አድርጓል። ውይይቱንም ታሪካዊ ያስብለዋል።

የኢህአዴግ ምክትል ሊቀመንበርና የብአዴን ሊቀመንበር ደመቀ መኮንን እንደገለጹትም፤ በችግሮቹ ላይ በስፋት በመወያየት ችግሮች ያሉት በአንድ ድርጅት ላይ ብቻ ሳይሆን በሁሉም ዘንድ መሆኑ ታይቷል።

ስራአስፈጻሚው በችግሮች ላይ በመግባባት የጋራ ግንዛቤ መውሰድ፣ በጥልቅ አስተሳሰብ የተግባር መፍትሄ መሰጠቱን አጽንኦት ሰጥተዋል።
እዚህ ላይ የተፈጠረውን የሀሳብ አንድነት ወደ ተግባር ለመቀየርም ተወስኗል ብለዋል።

የኦህዴድ ሊቀመንበር ለማ መገርሳ በበኩላቸው ግንባሩ ጤናማ የፖለቲካ ሁኔታን ጠብቆ ለመሄድ ችግሮቹን በመለየት የመፍትሄ አቅጣጫ ማስቀመጡ ወሳኝ ጉዳይ መሆኑን ነው ያመለከቱት።

በግምገማው ሁሉንም ነገሮች በቡድንም ሆነ በግል በግልጽ መታየታቸውን አመልክተው፤ የአገር ሁኔታን ጥያቄ ውስጥ የከተተውን ሁኔታ በጥልቀት መታየቱንና በግልጽ ውይይት መደረጉን አረጋግጠዋል።

የህወሓት ሊቀመንበር ዶክተር ደብረጽዮን ገብረሚካኤል እንደተናገሩት በአሁኑ ግምገማ ቀደም ብሎ በተካሄዱ ተሃድሶዎች ያልታዩ ጉዳዮችንም መፈተሽ ተችሏል።

በውስጥ የነበሩ ክፍተቶች፣ መጠራጠሮችና አለመተማመንን ለመፍታት የተቻለበትና በሚገባ የታየበት መሆኑን ጠቁመዋል።

በሌላ በኩል ብሄራዊ ድርጅቶቹ ውስጠ ዴሞክራሲ እየጠፋ መምጣቱ ለድርጅቱም ሆነ ለአገሪቷ አደገኛ መሆኑን በመገንዘብ የማስተካከያ አቅጣጫ መቀመጡን ገልጸዋል።

ብሄራዊ ድርጅቶቹ የውስጥ ዴሞክራሲ እጦት ለቡድንተኝነትና መጠቃቀም በር መክፈቱን የጠቆሙት ሊቃነ መናብርቱ፤ መርህ አልባ ግንኙነት እንዲሰፍን ማድረጉን ተናግረዋል።

በግንባሩ ውስጥ የታየው የውስጠ ዴሞክራሲ እጦት ወደ ሌላ እየተላለፈ የሀሳብ መንሸራሸርን የገታ ሲሆን፤ የጉዳዮች በመርህ ደረጃ መታየት መጥፋቱ ለችግሮች መስፈንና ለመርህ አልባ ግንኙነት መፈጠር መንስኤ መሆኑ ተመልክቷል።

በግንባሩ ውሰጥ “እኔ ትክክል ነኝ“ የሚል አስተሳሰብ እየነገሰበት መምጣቱንም ነው ሊቃነ መናብርቱ ያመለከቱት።

በዚህም በግለሰባዊና ቡድናዊ ስሜት ተገፋፍተው የተፈጠሩ ስህተቶች መኖራቸው ተጠቁሟል።

በግንባሩ ዴሞክራሲ እንዲሰፍንና የፖለቲካ ምህዳሩ እንዲሰፋ ከማድረግ አኳያ የነበሩ ጉድለቶች መታየታቸውንም ጠቁመዋል።

የኢህአዴግ ሊቀመንበር አቶ ኃይለማርያም ደሳለኝ እንደተናገሩት፤ የተቃዋሚ ፓርቲዎች ተሳትፎ መድበለ ፓርቲ ለማረጋገጥ ወሳኝ ነው። ከዚህ አኳያ የፖለቲካ ምህዳሩን በማስፋትና የመድብለ ፓርቲ ስርዓት እንዲያብብ ከማድረግ አኳያ ተጽእኖዎች እንደነበሩ አንስተዋል።

ምንጭ፦ ኢዜአ

Exit mobile version