የኦሮሚያ ክልል በሀሰተኛ የትምህርት ማስረጃ ሲሰሩ የነበሩ ከ1 ሺህ በላይ የመንግስት




የኦሮሚያ ክልል በሀሰተኛ የትምህርት ማስረጃ ሲሰሩ የነበሩ ከ1 ሺህ በላይ የመንግስት ሰራተኞች መገኘታቸውን ገለፀ

አዲስ አበባ፣ ነሐሴ 6፣ 2009 (ኤፍ ቢ ሲ) በኦሮሚያ ክልል በሀሰተኛ የትምህርት ማስረጃ ሲሰሩ የነበሩ ከ1 ሺህ በላይ የመንግስት ሰራተኞች መገኘታቸውን የክልሉ የፐብሊክ ሰርቪስና የሰው ሀብት ልማት ቢሮ ገለጸ።

ከሐምሌ 15 እስከ ነሐሴ 15 ቀን 2009 ዓ.ም ሀሰተኛ የትምህርት ማስረጃ ይሰሩ የነበሩ የመንግስት ሰራተኞቹ እራሳቸውን እንዲያጋልጡ በተሰጣቸው ዕድል መሰረት ሰራተኞቹ ራሳቸውን እያጋለጡ ነው ተብሏል።

የቢሮው ኃላፊ ዶክተር ቢቂላ ሁሪሳ እንደገለጹት፥ እስካሁን በተሰራው የማጥራት ስራ ህገወጥ ማስረጃ ኖሯቸው የተገኙ ሰራተኞች፥ በክልሉ ከወረዳ እስከ ክልል ድረስ ባሉ የተለያዩ መስሪያ ቤቶች ውስጥ በሀሰተኛ የትምህርት ማስረጃ የሚሰሩ ናቸው።

በዚህም ያለአግባብ የማይገባቸውን ጥቅም እያገኙና በማይመጥናቸው የስራ ደረጃ ላይ በመስራት ላይ መሆናቸውን ተናግረዋል።

በተሰጠው ጊዜ ውስጥ ራሳቸውን የሚያጋልጡ ሰራተኞች ይቅርታ ተደርጎላቸው፥ ከዚህ በፊት ባላቸው ትክክለኛ የትምህርት ማስረጃና በሚመጥናቸው የስራ ቦታ እንደሚመደቡ ነው ሃላፊው የጠቆሙት፡፡

“ከነሐሴ 16 ቀን 2009 ዓ.ም ጀምሮ ቢሮው በሚያደርገው ማጣራት ህጋዊ ያልሆነ መረጃ ይዘው በማገልግል ላይ ያሉ ሰራተኞች ከስራቸው እስከ መጨረሻ ድረስ ይባረራሉ፤ እስከ አሁን በሀሰተኛ መረጃ ያገኙትን ደመወዝና ጥቅማጥቅም ይመልሳሉ” ነው ያሉት ዶክተር ቢቂላ።

ብቁ እና ተገቢውን አገልግሎት ለተጋልጋዩ ህብረተሰብ መስጠት የሚችል ሰራተኛ ለመፍጠር በተያዘው አሰራር መሰረት የማጥራቱ ስራ እንደሚቀጥል ገልፀው፥ በመጀመሪያ ወደ ቅጣት ያልተገባው ሰራተኛው ጥፋቱን አምኖ ራሱን እንዲያጋልጥ መሆኑን ተናግረዋል።

የማጣራቱ ስራ ከፖሊስ ጋር በመሆን ሰራተኛው የትምህርት ማስረጃ ያገኘባቸው የከፍተኛ ትምህርት ተቋማት ላይ ምርመራ በመደረግ ላይ እንደሚገኝም ዶክተር ቢቂላ ገልጸዋል።

በክልሉ ከ470 ሺህ በላይ የመንግስት ሰራተኞች ያሉ ሲሆን፥ በክልል ባሉት ተቋማት፣በከተማ አስተዳደሮች፣በዞኖች፣ በወረዳ እና በመንግስት የልማት ድርጅት የሚሰሩ ናቸው መባሉን የኢዜአ ዘገባ ያሳያል።

Source: satenaw.com


DhRTVO 06 12 2009] Akka naannoo Oromiyaatti paabliik sarvaantoonni ragaa sobaa qaban kuma tokko of saaxilan.